Околу 3.498 осигуреници, овластени лица и здравствени работници, за само еден месец од воведувањето ги искористиле електронските услуги и поднеле барање од своите домови или работни места по електронски пат за остварување одредено право, покажуваат првичните податоци на Фондот за здравствено осигурување (ФЗОМ).
Како што се наведува во соопштението на ФЗОМ, најчесто користена електронска услуга овој месец е за заверка на ортопедски помагала, која 2.838 осигуреници ја искористиле и поднеле документи преку матичните лекари и лекарите специјалисти по електронски пат.
ФЗОМ за унапредување и олеснување на комуникацијата помеѓу Фондот и осигурениците, фирмите и здравствените работници неодамна овозможи сет електронски услуги на порталот на Фондот со кои на брз, лесен и ефикасен начин осигурениците можат да ги остварат своите законски права без притоа да мораат да доаѓаат на шалтерите.
Со воведување на електронските услуги на ФЗОМ осигурениците, фирмите и здравствените работници го избегнуваат одењето во подрачните служби, а со самото тоа и трошењето време и финансиски средства, а се овозможува и увид во сопствениот предмет, дали е позитивно или негативно решен и кога ќе биде извршена исплатата доколку се работи за рефундација на средства.