Агенцијата за промоција и поддршка на туризмот на Република Македонија ја претставува туристичката понуда на Македонија на Саемот за туризам во Белград, Србија што се одржува од 18 до 21 февруари.
Претставници од Агенцијата за промоција и поддршка на туризмот на РМ за време на саемот остварија средба со цел соработка со тур-операторите Magelan Travel, Topone, Ponte Travel, додека со Националната асоцијација на туристички работници на Србија – YUTA беа дискутирани можностите за интензивирање на соработката помеѓу тур-операторите од Македонија и Србија преку организација на регионални кружни тури.
Како што соопшти Агенцијата, бројот на туристи од Србија во Македонија бележи константен раст од 4 до 6 проценти на годишно ниво во последните пет години, а за наредната година приватиот сектор од двете земји очекува тој тренд на раст да продолжи.
Оваа година земја партнер на саемот за туризам во Белград е Република Словенија, додека идната година е предвидено да биде Република Црна Гора. Очекувањата се дека во 2018-та година Македонија ќе биде земја партнер на белградскиот саем за туризам.
На Саемот за туризам во Белград кој има 30-годишна традиција, оваа година учествуваа повеќе од 1.000 излагачи, а само првиот ден броеше над 60.000 посетители. Ова е прв саем годинава на кој Република Македонија ќе ги претстави своите потенцијали, а наредниот месец тоа ќе го стори на саем за туризам во Ниш, стои во соопштението од Агенцијата за промоција и поддршка на туризмот на Република Македонија.