Оценувањето на вработените во адмнистрацијата годинава функционира само како пилот проект. Нема ниту казни, ниту награди, кои манипулативно не ги спомнува Кирацовски, се вели во реакцијата на ВМРО-ДПМНЕ на прес-конференцијата на потпретседателот на СДСМ и дополнителен заменик-министер за информатично општество и администрација.
“Спасувањето” на администрација кое што денес си го припиша Кирацовски е со закон утврдено уште пред Зоран Заев да го постави за дополнителен заменик министер, се вели во соопштението. Воедно, во врска со презентираните податоци за оценување на административни службеници од ВМРО-ДПМНЕ посочуваат дека тој манипулирал со јавноста бидејќи за отказ потребно е администативецот да биде оценет со единица, а исто така го оспоруваат и начинот на кој дошол до листите со оценки.
– Менаџирањето со институции и вработени е нешто што Кирацовски допрва треба да го искуси и научи во пракса, со оглед дека неговиот работен стаж пред „дополнителното заменичко министерување” од ноември 2015 година наваму изнесува точно 0 години, 0 месеци, 0 денови, 0 часови и 0 минути. Најстрашно од се е што Кирацовски денес јавно го демонстрираше криминалниот начин на функционирање на неговата партија. Кирацовски украл лични податоци од институцијата во која што работи и ги доставил во неговиот партиски штаб. Ова е скандал кој потврдува дека СДСМ ги сфаќа институциите како погони во нивната Фабрика за афери, се вели во реакцијата на ВМРО-ДПМНЕ.