„Проблемот со квалитетот на воздухот е децениски и прашањето е кој и што правел за негово надминување. СДСМ денес лицемерно говори за чистиот воздух, а кога беа на власт можеа барем нешто да направат по ова прашање, наместо да го игнорираат и да го кријат проблемот под тепих. Тие дури и не се осудија да постават мерни станици и на тој начин да им овозможат на граѓаните да го следат квалитетот на воздухот. Придонесот на СДСМ за решавање на ова прашање е рамно на нула. Денес се превземаат низа на мерки кои СДСМ може да ги погледне ако ги прочита соопштенијата во изминатите денови.
Така нa пример, сега им се препорачува на сите правни субјекти во Градот Скопје и Општината Тетово да ги ослободат од работни обврски бремените жени, лица над 60 годишна возраст со респираторни и кардиоваскуларни заболувања, како и лица под 60 годишна возраст со дијагноза астма и хронична опструктивна белодробна болест (ХОББ).
Владата на Република Македонија во усвоените заклучоци на крајот на минатата година им препорача на Градот Скопје и oпштината Тетово да ги интензивираат активностите за чистење на улиците, особено околу градилиштата.
Владата го задолжи Државниот инспекторат за животна средина да врши секојдневна вонредна контрола во инсталациите кои подлежат на А интегрирана еколошка дозвола и секој ден да доставува извештај до Министерот за животна средина и просторно планирање и до Министерот за здравство.
Владата им препорача на Градот Скопје и другите општини, преку овластените инспектори за животна средина и комуналните инспектори да вршат еднаш неделно контрола на инсталациите кои подлежат на Б интегрирана еколошка дозвола само во делот на емисии во воздухот и имисии. Притоа, во рамки на контролите на територија на Градот Скопје и Општината Тетово, се даде препорака за редуцирана работа на индустриските капацитети во соодветната единица на локалната самоуправа.
Конкретно во Скопје оваа Влада и градоначалникот Трајановски изградија и проширија булевари во Скопје за побрз проток на сообраќајот. Оваа влада набави преку 300 нови автобуси кои 40 години не беа променети. Оваа влада направи проект за гасификација на цела Македонија и целосна гасификација на Скопје, што СДСМ пропушти да го направи кога беше на власт.Се заменија котлите за греење на гас во Клинички центар и други здравствени домови и во поголем број училишта.
Граѓаните знаат кој работел а кој не за решавање на проблемот со квалитетот на воздухот. СДСМ може да ја трујат јавноста и да сеат магла со своите соопштенија, но граѓаните се мудри и можат лесно да ги препознаат ефтините манипулации на СДСМ. И за овие манипулации СДСМ ќе биде казнета на 24 април, кога народот ќе им го испорача десетиот јубилеен пораз. До тогаш остануваат само уште 76 дена“, велат од ВМРО-ДПМНЕ.