Регионалниот центар за управување со кризи од Гевгелија информираше дека заклучно со 10 часот утрово, во ПТЦ Гевгелија нема пристигнато нови мигранти од грчка страна.
Денеска состојбата е стабилна и мирна и во моментот нема мигранти во и надвор од ПТЦ Гевгелија, јавио дописникот на МИА од Гевгелија.
Во извештајниот период од Гевгелија кон Табановце биле транспортирани со воз и такси возила 393 мигранти кои беа останати од вчера.
Моментно на граничниот камен 59, како и во гевгелискиот камп состојбата е мирна. Како што јави дописникот на МИА од Гевгелија, мигранти во моментот нема, а многу мала е нивната раздвиженост и на грчка страна во кампот кај Идомени од каде изминатото деноноќие нема пристигнато ниту еден бегалец.
Јавната здравствена организација од Гевгелија во извештајниот период изврши само четири интервенции, а периодот на затишје го искористи да изврши дезинфекција на површина од 7.800 метри квадратни и да постави 30 мамци за глодари.
Екипите на Црвениот крст извршиле пет интервенции и 46 асистенции.
Од УНХЦР соопштија дека немаат информации за пристигнати мигранти на грчките пристаништа.