Социјалдемократскиот сојуз и здружената опозиција деновиве ќе ги донесат своите одлуки за учество во владата и за следните чекори, рече лидерот на опозицијата, Зоран Заев.
Тој нагласи дека без регулација на медиумите и професионални стандарди во медиумскиот простор и без прочистен избирачки список не може да има фер, демократски и регуларни избори во Република Македонија.
– Оваа патологија што ја наметнува Никола Груевски, поддржан од Али Ахмети, претставува насилство врз независната Државна изборна комисија, рече Заев.
Тој додаде дека ДИК е таа која што е должна и под кривична одговорност со потпишувањето на Избирачкиот список. Според него, од денеска до денот до кога треба да се прочисти Избирачкиот список остануваат точно 45 дена, со што е невозможно да се прочисти списокот, а истото веќе го потврди и претседателот на Државната изборна комисија.
– Но, едно знам, после тоа што вчера се случи слободно можам да испратам апел, да го поттикнам, целиот демократски свет, сите демократски сили во Република Македонија, малку е здружената опозиција, ги поттикнувам сите политички партии со сите етнички предзнаци во своето постоење, ги повикувам сите интелектуалци, новинари, сите борци за слобода и демократија на заедничко здружување во една заедничка платформа за спас на Македонија, рече Заев.