Најголемите градови во Италија, Рим и Милано поради покачените ПМ 10 честички над дозволените 50 микрограми на метар кубен воздух, го забранија сообраќајот.
Во двата града загадувањето континуирано 18 дена се движело 60 до 70 микгрограми на метар кубен воздух, по што се одлучиле на оваа постапка.
Македонија го има истиот проблем, но со далеку позагрижувачки бројки од Италија. Тетово веќе цел месец дише канцерогени честички чија бројка во еден момент достигна над 800 мирограми на метар кубен воздух.
Иако на масовниот протест во понеделникот до македонските власти беа упатени слични препораки, тие веќе втор ден молчат.
Камерата на А1он и денеска забележа гужва на улиците во центарот на Скопје каде загадувањето месецов има достигнато бројки над 500 микрограми на метар кубен. Став за овој проблем и за тоа дали можеби и Скопје ќе побара „денови без автомобили“ побаравме и од надлежните во Градот, но од таму не добивме никаков одговор.
Револтираните граѓани кои протестираа во понеделникот, до државниот врв упатија ултиматум доколку не се среди проблемот со загадувањето до 15 јануари, тие ќе ги блокираат најзагадените градови во државата.
Фотографиите на „УС ЕПА“ покажуваат дека ПМ 10 честичките се пет пати помали од влакно, а ПМ 2.5 честичките се 20 пати помали од влакното, што прави тие трајно да останат во човековиот организам.
Александар Тодески