Новиот објект на театарот во Струмица се гради според планираната динамика. До почетокот на декември треба да биде изградена карабината на сценската кула, а паралелно ќе се работи и на гледалиштето. Во план е новиот театар во Струмица, кој се гради на местото на стариот и опожарен театар, да биде пуштен во употреба во декември идната година.
Министерката за култура Елизабета Канческа-Милевска денеска ја посети локацијата на изградба, која е во густо градско јадро, меѓу индивидуални згради и градинка.
– Во изминатиот период се водеше грижа во однос на неговото втемелување. Можеби некои работи не се толку видливи, но се многу значајни и изработени темелно. Според динамиката, до почетокот на декември треба да биде изградена карабината на сценската кула. Паралелно ќе се работи и на гледалиштето. Ќе ја следиме динамиката на градењето на театарот и се надеваме дека во декември идната година ќе можеме да го пуштиме во употреба новиот струмички театар. Изградбата на новиот театар ќе чини 4 милиони евра. Министерството за култура и Владата имаат обезбедено средства и како што оди изградбата, етапно ќе му бидат исплаќани на изведувачот, изјави Канческа-Милевска.
Министерката им се заблагодари и на вработените во Заводот и Музеј – Струмица кои при копањето на темелите на новиот театар откриле и извршиле конзервација на бедем од средниот век, кој ќе биде заштитен и ќе биде составен дел од партерното уредување на новиот театар.
Таа ги спомна и низата проекти кои Министерството за култура и Заводот и Музеј – Струмица ги реализираат во рамки на годинашните програми. Станува збор за уредување на археолошко-етнолошката поставка во Заводот и Музеј Струмица која ќе биде целосно нова и опремена со најсовремена технологија и со нови витрини во кои ќе бидат изложени сите важни артефакти.
– Ќе имаме реконципирање и на историската и етнолошката поставка и очекуваме следната година оваа нова поставка да ја краси самата институција. Верувам дека ќе биде многу значајна и за самите граѓани на Струмица и за сите посетители кои доаѓаат да се запознаат со вредното културно и историско богатство што го поседува градот. За овој проект се издвоени 2 милиони денари. Исто така, дозволен е и проект за уредување на депоата на самата институција, во висина од 177.000 денари, така што во текот на идната година тие ќе бидат дадени во употреба, рече министерката за култура.
Директорот на Завод и Музеј-Струмица Зоран Рујак истакна дека оваа институција согласно со програмата за работа, во текот на годината извршила повеќе конзервации и реставрации на објекти, а во делот на археологијата извршени се истражувања на локалитетот Цревено Поле, Термите во Банско. Во истражувањата е откриена мала црква во комплексот Цареви Кули.