Фестивалот на електронска музика и медиумски уметности „Де:сонанз“ е еден од водечките настани во земјата и во регионот во промоцијата на модерната музика и мултимедијалната уметност. Својата репутација фестивалот внимателно ја негува и на седмото издание, што почнува вечерва и ќе трае до 7 септември во МКЦ и на повеќе локации во Скопје.
На програмата на годинашното издание се над 40 музички настапи, изложби и мултимедијални перформанси. Главната програма на седмиот „Де:сонанз“ (de:sonanz) ја сочинуваат артистите Монолејк (Monolake) и Објект (Objekt) од Берлин, Германија; Електрик Индиго (Electric Indigo) од Виена, Австрија; Дисфонија (Disphonia) од В. Британија и Грција; Атом/Аутпут (Atop/Output) од Белград, Србија; Абдукт (Abduct) од Мексико и Марија Б. Џоунс (Marija B. Jones) од Лондон, В. Британија.
Поддршка од екипите на домашната сцена доаѓа од BTKRSH, D2, „PMG Recordings“, „Drop Series“, DSPH, „Ако никој не свири“, а предвидени се и работилници, изложби, филмска програма, афтерпарти и денска програма.
Фестивалот негува и програма на мултимедијални уметнички настапи, меѓу кои неколку светски премиери и концертни промоции на нови дела од македонската сцена, како Александра Петрушевска и Александар Гроздановски (Херцел) – „Два“ (аудио-визуелен танц-перформанс), Димитар Додовски и Јуџо – „Potential Worlds“ (поезија / аудио / видео настап), концертна промоција на албумот „Мис Слобода“ на Телемама и концертна промоција на новиот албум на групата „Демек“.
Фестивалот „Де:сонанз“ е поддржан од Гете институт – Скопје.