Пратеничката на ДУИ, Ермира Мехмети, во разговор за БИРН вели дека многу е навредена од снимките во кои Албанците се нарекуваат „диво племе“ и „Индијанци“ и поради нив на Фејсбук побара Груевски да даде оставка, а нејзината партија да ја напушти коалицијата. Таа смета дека гласот на ДУИ не бил доволно силно слушнат во Владата и затоа нејзината партија страдала и плаќала преголема цена.
– Снимките покажуваат една арогантна доминација. Има сериозни недоследности во начинот како функционира оваа Влада и мислам дека е неиздржливо да продолжи оваа соработка – вели Мехмети.
Проблемот е, смета таа, доминантниот стил на владеење на Груевски.
– Тој има тешкотии да разбере зошто е потребен меѓуетнички дијалог, има проблем да разбере зошто е потребен дијалог со опозицијата, има проблем да разбере зошто е потребен дијалог со медиумите, зошто е потребно независно судство, зошто невладиниот сектор има граѓанска должност да го критикува работењето на Владата и да придонесе во демократскиот амбиент – вели Мехмети.
Таа е уверена дека земјата не се движи напред и дека се поткопани сите демократски институции, медиумите, судството и невладиниот сектор. Чувствува одговорност, бидејќи долго време е дел од власта и токму затоа јавно проговорила.
– Безмалку сите Албанците го споделуваат чувството на разочараност од начинот како ВМРО-ДПМНЕ го разбира соживотот – смета народната избраничка.