Во големиот пожар што се случи денеска наутро во Дебар, во кој изгоре објектот на поранешниот Ученички дом, изгореле целосно архивите и други документи на општинската синдикална и боречка организација.
Претседателката на синдикалната органзиација, Нуртен Јајага, информираше дека таа кај надлежните органи веќе пријавила дека целосно изгорела архивата на Синдикатот, којашто била сместена во заедничка просторија со Организацијата на борците, токму во овој објект.
И претседателот на здружението на борците од НОБ – Дебар, Ирфан Уштеленца, изјави дека изгорела целосно архивата на борците од НОБ. Тој информираше дека изгореле и 1400 досиеја на борците од Дебар, меѓу кои и оние на првоборците и народните херои од Дебар и Дебарско.
Причината за избувнувањето на пожарот се очекува да биде позната во наредните денови откако ќе биде завршен увидот од надлежните служби.
