Претставничката на ОБСЕ за Слобода на медиумите, Дуња Мијатовиќ, денеска го осуди вчерашниот напад врз новинарот Саше Ивановски во Скопје.
„Ова е најновиот во серијата инциденти на насилство и закани насочени кон новинари. Овој растечки тренд на насилство врз припадниците на медиумите мора да се спречи и затоа ги повикувам властите веднаш и целосно да го испитаат бруталниот напад на Ивановски“, напиша Мијатовиќ.
Вчеравечер сопственикот на интернет порталот Мактел, Саше Ивановски беше брутално нападнат и претепан од страна на две лица. Се здобил со повреди на главата и грбот, при што била побарана медицинска помош. Ивановски го пријавил нападот во полицијата, потсетува Мијатовиќ.
Во последните неколку недели, претставникот за медиуми изразуваше загриженост до властите во Скопје велејќи дека насилните напади врз новинарите водат до атмосфера на неказнување.