Наспроти ВМРО-ДПМНЕ опозицијата во изминатите четири години делуваше деструктивно, без сериозна програма ниту со тим кој влева доверба, ниту пак се реформираше и кадровски и суштински што ни помогна поцврсто да ја освојуваме подршката на мнозинството граѓани, оцени претседателот на ВМРО-ДПМНЕ и актуелен премиер Никола Груевски во обраќањето на 15. Конгрес на партијата во Куманово.
– Делуваа деструктивно, и сметаа, и се уште сметаат, дека ќе загубиме бидејки во еден момент ќе му здосадиме на народот, и само заради тоа ним ќе им ја врати довербата, онака нереформирани и без издржана визија. Ако нешто од нив се памти во овие четири години се навреди, омаловажувања, интриги, конфликти, закани, манипулации, а во последно време и монтажи. Оваа нивна дезориентираност и деструктивност само ни помогна поцврсто да ја освојуваме поддршката на мнозинството граѓани, рече Груевски.
Она што е карактеристично за нас во овој изминат четиригодишен период, додаде тој, е што и покрај некои пропусти, грешки и застранувања, генерално успеавме да се задржиме на земја, заедно со и меѓу народот.
– Народот знае да е и крајно толерантен за одредени грешки и пропусти, па и по некои неисполнети ветувања, се додека не констатира, дека партијата или политичарите која ја поддржал сериозно ги изневерила очекувањата и пред се ветувањата. Тогаш следува казната. Па како и секаде во светот и во секоја демократија и нам тоа ни беше и ќе продолжи да ни биде еден од најголемите предизвици, но и обврски, рече Груевски посочувајќи дека не се иззема ниту себеси од ситуацијата.
– И јас сум човек, кој работи и греши. И затоа никогаш, моите соработници тоа добро го знаат, никогаш не сум обесхрабрил на состаноците нечија добронамерна дискусија со забелесшки кон моите предлози и идеи по одредени прашања, а истите најдобро знаат колку пати по ислушана добра аргументација сум се откажувал од моите ставови и сум прифаќал нечии поквалитетни. Знаете, да не почнеме да си збориме сами за себе дека господ не црпнал од некаде оти сме нешто посебно, и слични работи, бидејки тоа се првите сериозни симпоми на одлепеност од реалноста. Заради тоа, меѓудругото, повремено се потребни и освежувања на функционерските места, со можност дел од сменетите повторно во иднина да добијат некоја значајна одговорност, доколку ја заслужуваат, истакна Груевски.