Временските услови кои беа пропратени со обилни врнежи од дожд, по повеќе од триесет години сушност на Дојран му ја вратија Деребашка река која си формира и водопад како уште една туристичка атракција за гостите кои летово ќе престојуваат на брегот на Дојранското езеро.
Феноменот го привлече и вниманието на жителите на Стар Дојран затоа што за разлика од повеќето планински извори кои се студени, водата на Деребашка река е млака и беспрекорно бистра.
Постарите дојранчани се присетија на времето кога реката секнала поради бушење на подземни бунари за снабдување со питка вода.
– Во 80-тите години се бараше вода за пиење со бушотини под нивото на езерото.Тогаш се направија резервоарите за питка вода,но Деребашка река сосема секна.Сега,после 35 години сведоци сме на своевиден феномен,водата е надојдена во голема количина и дури самата си формира и водопад, рече Илија Кочарев, жител на Стар Дојран.
Дојранчани се надеваат дека поради живописната природа и панорамата кон езерото, Деребашкиот водопад ќе се уреди и ќе им се презентира на посетителите како уште една од природните убавини на Дојран.