Двете новороденчиња за кои во медиумите беше објавено дека постои можност да починале по прием на вакцина Дитепер воопшто не биле вакцинирани со неа, соопшти денеска Јованка Костовска, претседател на Комисија за заразни болести.
Формирана е комисија која ќе изврши контрола кај матичниот лекар, кај тимовите за вакцинација и секаде каде што биле лекувани овие деца или биле примени пред да им биде констатирана смрт. Се чекаат резултатите од обдукцијата кои треба да покажат од што настапила смртта, информира Костовска.
Едното од бебињата било на двемесечна возраст, а другото имало еден месец. Едното е од Студеничани, а другото од Шутка.
Дитепер вакцина се дава, како што појасни Кокстовска, дури по наполнети три месеци.
Дел од медиумите претходно објавија дека едното од новороденчињата починало на 1, а другото на 3 март, отако примиле вакцина Дитепер.