„Форумот на слободоумни патриоти очекува и бара нашата ВМРО-ДПМНЕ да ја преброди оваа тешка политичка и државна криза и на наредните паралементарни избори да победи. Форумот очекува од ВМРО-ДПМНЕ од оваа тешка криза да излезе консолидиран, прочистен и со победнички дух. Но, за да се дојде до оваа победничка позиција потребно е претседателот на ВМРО-ДПМНЕ, Никола Груевски да покаже висок морал и лидерски капацитет и да овозможи одговорност за сите извршителите на прекршувањата на Уставот и законите и масовните повреди на човековите слободи и права како и да ги обезбеди сите услови за правно и политичко расчистување на кризата.
Доколку нашето ВМРО-ДПМНЕ навистина сака да излезе како победник од кризата најмалку е потребно раководството и органите на партијата да се кријат зад застарените и прегазени од историјата концепти на колективна одговорност. Ваквите приоди се опасни по судбината на Република Македонија. Тие во заложништво ја ставаат целата држава себично наведувајќи ја кон се потежок граѓанско-партиски конфликт кој лесно може да прерасне во најстрашното. Каква е таа „борба“ која Македонецот треба да ја води со Македонецот во ситуација кога немаме ни елементарен меѓупартиски разговор и политички дијалог. Токму вакви опасно заканувачки пораки несмасно се искажани во последното соопштение на Централниот комитет.
Форумот на слободоумни патриоти го повикува членството да ги покрене сите статутарни и политички механизми за расчистување на одговорноста во своите внатрешни редови и да не дозволи целата партија да биде доведена во прашање поради поединечни грешки.
Форумот на слободоумни патриоти ја повикува Европската унија да испрати на помош судии и јавни обвинители кои ќе помогнат во оваа кризна ситуација правосудството да работи независно од било какви влијанија, професионално, непристрасно и достоинствено. Форумот ја повикува ЕУ да испрати и други професионални лица кои ќе помогнат во изготвувањето на предложениот пакет закони преложени од страна на Форумот кој ќе гарантира дека вакви политички и државни кризи никогаш повеќе нема да се повторат“, се вели во соопштението на Форумот на слободоумни патриоти.
