Претседателот на Европската комисија Жан Клод Јункер во интервју за германски весник ја исклучи можноста Грција да излезе од еврозоната, а вината за кризата во земјата им ја припиша на грчките влади и на самите граѓани, кои дозволиле да бидат направени сите тие грешки, јавуваат грчките медиуми.
– Новата грчка Влада треба да биде прифатена пријателски. Грците мислат дека не се виновни за проблемите на нивната земја, но ниту Германците, ниту Холанѓаните не гласаа за ПАСОК и Нова демократија во изминатите 40 години. И Грците имаат вина, која не можат да ја негираат, нагласи Јункер.
Директорот на Меѓународниот монетарен фонд Кристин Лагард изјави дека веројатноста за излегување на Грција од еврозоната воопшто не е предмет на расправа.
– Она за што се дискутира е како да имаме доверба едни во други за да чекориме напред. Важно е грчката економија во рамките на еден комплексен план да може да стане посилна и поефикаснка и да биде создадена можност за отварање работни места, истакна Лагард.