Фотографот Голканбхан Хасан, кој пристигна заедно со иранскиот претседател Махмуд Ахмадинеџад на седницата на Генералното собрание на Обединетите нации, минатата недела, не се врати на Иран, туку побара азил од САД, објави Си-Ен-Ен (CNN).
Неговиот адвокат, Пол Одвајер изјави дека Голканбхан стравува од политичко гонење поради своето противење на иранската влада, а неговата сопруга и двете деца го напуштиле Иран и во моментот се скриени на безбедно место.
„Тој се плаши да се врати во Иран. Го гледаат како противник, а не како некој кој се согласува со режимот во Иран“, рече Одвајер.
Адвокатот одби да открие каде е фотографот сега, но соопшти дека тој чека за да разговара со американските власти за азил, што би можело да потрае со месеци.