Управата на македонскиот кошаркарски шампион МЗТ Скопје Аеродром ја прифати оставката на досегашниот тренер Боби Митев и соопшти дека во наредниот период клубот ќе го води досегашниот помошник Александар Јончевски.
– КК МЗТ Скопје Аеродром информира дека е прифатена понудената оставка на тренерот Боби Митев и тој веќе нема да го предводи македонскиот кошаркарски шампион. МЗТ Скопје Аеродром му се заблагодарува на тренерот Митев за вложениот труд во периодот додека беше помошен и прв тренер на тимот, и му посакува многу успех во понатамошната кариера. Во наредниот период тимот ќе биде предводен од Александар Јончевски, соопштија попладнево од МЗТ преку официјалната веб страна.
Митев е трет тренер од почетокот на сезоната, кој си заминува од тренерската позиција на МЗТ Скопје Аеродром. Тој поднесе оставка по синоќешниот пораз од Будуќност. Пред Митев кормилото на „штрковите“ го напуштија Змаго Сагадин и Врбица Стефанов.