Општина Куманово денеска го одбележа Денот на ослободувањето на градот. По тој повод делегации од Сојузот на борците, локалната самоуправа, АРМ, МВР, амбасадите на Хрватска и Унгарија, како и невладиниот сектор и политичките партии положија цвеќе пред Спомен Костурницата.
Осврнувајќи се на историските настани од тој период потпретседателот на Општинската организација на Сојузот на борците Цоки Ристовски истакна дека Куманово даде огромни жртви во НОБ.
– Денес сме тука да го означиме овој значаен ден и дадеме ветување дека она што некој го создал, дал жртви, треба да го чуваме, негуваме и надградуваме. Тоа ни е завет и историска обврска на сите кон нашиот народ, нашите претходници и должност кон идните генерации, рече Ристовски.
Општина Куманово организираше свечен прием за градоначалниците од збратимените градови Кампина, Чорлу, Бјелина, Кампина, Никшиќ и Чукарица.
Градоначалникот на општина Куманово, Зоран Дамјановски зборувапе за развојот на Куманово по ослободувањето, а воедно посочи дека годинава се одбележуваат и 495 години од постоењето на градот.
Претседателот на Советот на општината Максим Димитријевски најави дека вечерва Советот ќе оддржи свечена седница на која членовите на етничките заедници во советот ќе се обратат пред присутните, а воедно ќе бидат врачени благодраници на граѓаните кои дале придонес за развојот на Куманово.
Советот на општина Куманово вечерва ќе ги додели и „Ноемвриските награди„ на поединци, претпријатија, установи и здруженија на граѓани.