Одговарајќи на новинарско прашање за последната серија напади и обвинувања од страна на советниците на СДСМ од Карпош, Градоначалникот Стевчо Јакимовски на денешната конференција за печат ја даде следната изјава:
-Ако не сум јас во Скопје не знам што би работела опозицијата. Да им дадам совет, да прошетаат до нивните општини во Струмица и Куманово и да направат 200-300 чекора лево и десно од централните градски подрачја и да видат на што им личат улиците и како луѓето таму газат кал. Нека прошетаат по нивните училишта и нека направат споредба со училиштата во општина Карпош, после што, јас сум длабоко уверен дека кога ќе се вратат ќе им се намалат фрустрациите.
Нивниот концепт е ширење на дефетизам и капитулански пристап. Да потсетам: тие ја подготвуваа Општината да ја предадат на Јагнула Куновска додека мојот концепт и мотив е да се борам и да се справувам со проблемите. Ова е е време на кризи со која е зафатена цела Европа и целиот регион, вклучувајќи ја и нашата држава. Затоа сум избран од граѓаните, да не се провлекувам пред проблемите туку да ги решавам. Инаку моите ветувања се мојата визија за развојот на општина Карпош, а како Општината ќе се развива, зависи и од тоа колку средства ќе имаме. Сепак, ние сме длабоко уверени дека оние ветувања што ги имаме дадено пред граѓаните и ќе ги оствариме за што имаме уште две и пол години работа .