Руските трупи се повлекуваат од Украина и пограничните подрачја, изјави американскиот државен секретар Џон Кери по разговорот со својот руски колега Сергеј Лавров, нагласувајќи дека се работи за еден од критериумите за укинување на санкции.
-Единиците се повлекуваат, тешката опрема мора да биде повлечена и границата треба да се контролира и обезбеди- изјави Кери, откако претходно рускиот претседател Владимир Путин најави повлекување на руските единици распоредени на границата со Украина.
-Постојат четири или пет услови кои треба да се почитуваат за укинување на санкциите, ослободување на заложниците, повлекување на единиците и опремата, почитување на границата под закрила на Организацијата за безбедност и соработка во Европа -нагласи Кери.
Рускиот министер за надворешни работи Сергеј Лавров се обиде да го убеди Кери дека санкциите се дополнителна причина за напнатост во односите помеѓу САД и ЕУ.
Тој го обвини американскиот претседател Барак Обама дека ја принудил ЕУ да усвои санкции против Русија и дека поради тоа руското стопанство е на раб на рецесија.
Е. Г.