Американската разузнавачка агенција ЦИА ја отстрани ознаката за доверливост од 100.000 документи, меѓу кои се наоѓаат и записи од историскиот мировен договор помеѓу Србите, Хрватите и Босанците, кој беше потпишан во Дејтон во 1995 година.
Во нив може да се види на кој начин Слободан Милошевиќ, Фрањо Туѓман и Алија Изетбеговиќ уживале, што јаделе и какви желби имале, додека донесувале одлука за судбината на милиони луѓе.
Од документите кои се однесуваат на преговорите во Дејтон, а се запишани под име АР70-141 ОСТ 201, се гледа како „актерите“ од поранешна Југославија со „полни усни со храна“ ги разгледуваат разорувачите Б-52 и невидливиот Ф-117, под чии крила се наоѓаат ракети „томахавк“.
Според тврдењата на американски агенти сите преговарачи на Милошевиќ му се обраќале со Слобо, на Алија Изетбеговиќ со Изи, додека на Момчило Краишник со Мо. Во истиот документ се наведува дека Милошевиќ често организирал вечери, на кои како што тврди ЦИА, јадел јастози од Мејн.
Лидерот на муслиманите од Босна, Алија Изетбеговиќ за време на паузите додека траел преговорот најмногу сакал да гледа фудбал.
Инаку со Дејтонскиот договор е ставен крај на граѓанската војна во БиХ, а на 14-ти декември истата година договорот е парафиран во Елисејската палата во Париз.
Е. Г.