На околу дваесеттина од седумдесеттина болни (меѓу кои две деца) од хронична миелоична леукемија им е неопходна второстепена терапија со лекот „тасигна“ односно „нилотиниб“.
Ова денеска го изјави претседателот на Здружението за помош на заболени од хронична миелоична леукемија на одбележувањето на 22 Септември, Меѓународен ден на заболените од ХМЛ. Од Здружението бараат „тасигната“ да се стави на позитивната листа на лекови.
– Сите заболени од ХМЛ во светот, па и во Албанија и Србија имаат второстепена терапија. Мора да најдеме начин и модус како да се бориме нашите пациенти да ги обезбедиме со лекови. Месечната терапија со „тасигна“ би чинела околу 4.000 евра според ценовниците достапни од Бирото за лекови. Ако се преземе нешто на ниво на држава, ако таа се зема во пакет со „гливек“ како што е во сите други земји во светот, мислам дека многу поевтино ќе биде, рече Леви.
Македонија, посочи тој, воведе копија на оргиналниот лек „гливек“ кој се покажа како епохално откритие кое ја спречи оваа смртноносна болест, но има пациенти кои се во многу лоша состојба.
Додаде дека неодамна добиле шесетмесечна терапија како донација од Бристол Маерс за пациентка од Струмица која не одговорила позитивно на „гливек“.
Пациентката Мирјана Илиевска истакна дека не може да го прима „гливекот“ и користи друга терапија од која добива рани по нозете и има болки.
– Го молам министерот да ни овозможи соодветен лек бидејќи верувајте на сите ни се живее, додаде Илиевска.