Од први септември годинава општата болница од Куманово ќе испрати шест лекари на специјализација во Скопје, од кои двајца на абдоменална хирургија, а по еден лекар на ортопедија, гинекологија, гастроенетрохепатологија и неврологија.
Како што информира директорот на болницата Ариф Латифи во текот на овој месец ќе биде распишан и интерен оглас за специјализација.
– Се надевам дека најмалку петмина кумановски лекари од оваа јавна здравствена установа ќе пројават интерес за специјализација. Станува збор за специјализации од интерна медицина, урологија и хирургија кои се мошне атрактивни за лекарите, вели Латифи.
Пред неколку месеци кумановската болница испрати неколку лекари на специјализаија по интерна медицина, педијатрија, психијатрија, патологија и гинекологија.
На ваков начин, обајснува Латифи, сукцесивно ќе се придонесе за намалување на недостигот на лекари специјалисти во општата болница Куманово. Во изминатиов период, додава, дел од лекарите заминаа во пензија, а други се транферираа во приватното здравство.
– Може да се каже дека во овој период најголема побарувачка за кадар има на гинеколгија, хирургија, интерна медицина и инфектологија, вели Латифи.
Општата болница до крајот на годинава ќе распише и конкурс за вработување на околу 20 здравствени работници.
– Со конкурсот покрај лекари се надеваме дека ќе вработиме и неколку рентген техничари, акушерки и медицински сестри, додава Латифи.
Со новите лекари специјалисти, според него, кумановската болница ќе функционира уште подобро и целосно ќе ги задоволи потребите на пациентите од општината, но и на пациентите од соседните општини од североисточниот регион. Општата болница Куманово ја покрива територијата на североисточниот дел со околу 200.000 жители.