Претседателот на Република Македонија Ѓорге Иванов упати честитка до Реџеп Таип Ердоган по повод неговиот избор на функцијата Претседател на Република Турција.
– Со големо задоволство ја примив веста дека турските граѓани Ви ја дадоа довербата и Ве избраа за Претседател на Република Турција. Во свое лично име и во име на граѓаните на Република Македонија, Ви упатувам срдечни честитки за изборот и искрени желби за успешно извршување на одговорната функција, се вели во честитката.
Претседателот Иванов во оваа пригода изразува задоволство од, како што се оценува, исклучително високиот степен на традиционални пријателски односи и соработка меѓу двете земји.
– Уверен сум дека во наредниот период соработката не само што ќе продолжи, туку и ќе се интензивира во сите области од заемен интерес, за што сакам да ја повторам мојата и на Република Македонија целосна подготвеност. Би сакал да искажам благодарност за безрезервната поддршка која Република Турција и ја дава на Република Македонија на патот на евроатлантската интеграција, како и да ја истакнам длабоката увереност и очекувањето дека ќе продолжи и во претстојниот период. Со такво уверување и со најискрени желби за Ваша успешна работа, добро здравје и лична среќа, Ви ги упатувам изразите на моето највисоко почитување, се наведува во честитката од претседателот Иванов.