Десетици илјади муслимани протестираа во петокот ширум арапскиот свет и во Азија поради филмот произведен во САД во кој се навредува исламот, а во текот на протестите се регистрирани и нови насилства, особено во Судан каде е запалена германската амбасада.
Во Картум околу пет илјади исламисти ги нападнале амбасадите на Германија и Велика Британија. Зградата на германската амбасада е запалена, симнато е германското знаме и заменето со исламистичко, јавува дописникот на AFP.
Во Либан околу 300 исламисти запалиле еден американски ресторан за брза храна во градот Триполи, а во Санаи полицијата пукала во воздух за да растера неколку стотини демонстранти коишто се приближиле на американската амбасада.
Полицијата во Јемен и во петокот употребила истрели во воздух и водени топови за да ги растера демонстрантите кои го запалиле американското знаме и бараат заминување од земјата на американскиот амбасадор. Во четвртокот во сличните безредија загинаа четири лица, а повеќе од 30 беа ранети.
Во Бангладеш околу десет илјади демонстранти во градот Дака ги запалиле израелското и американското знаме, додека во Индонезија протестирале околу 350 радикални исламисти.
Во иранската престолнина Техеран, илјадници луѓе се собрале извикувајќи „Смрт за Израел. Смрт за Америка”, а во египетската престолнина Каиро продолжуваат безредијата во коишто ноќта кон петокот имаше околу 200 повредени.
Слични слики може да се видат и во другите делови на муслиманскиот свет. Во Сирија околу 200 демонстранти се собрале пред зградата на САД во главниот град Дамаск, која веќе со месеци е затворена. Тие молчешкум носеле транспаренти со написи против спорниот филм „Невиноста на муслиманите”.
Демонстрациите се забележани и во Тунис и Јордан.