Матичната собраниска Комисија за економски прашања на денешната седница го разгледа Предлог-законот за изменување и дополнување на Законот за едношалтерски систем и водење на трговски регистар и регистар на други правни лица, во прво читање, и едногласно и без расправа заклучи дека е прифатлив и оти може да се даде на натамошно читање.
Целта на измените, како што појасни државниот секретар во Министерството за економија Анче Трифунов, е да се допрецизира и доуреди текстот на законот заради подоследна примена од страна на субјектите.
– Се врши допрецизирање со тоа што се дава можност за пријавите за упис на адреса на електронско сандаче поднесени од страна на субјектите до крајот на годинава, да им се евидентира без надоместок. Понатаму се определува дека изјавата за точноста и вистинитоста на податоците искажани во годишната сметка и финансиските извештаи е задолжителен прилог кон секоја годишна сметка и финансиски извештај потпишани од застапникот по закон. Ако се предадат во хартиена форма изјавата и финансискиот извештај се потпишуваат нормално, а ако се поднесуваат во електронска форма се потпишуваат со електронски потпис, рече Трифунов.
Предлогот не предизвикува фискални импликации врз Буџетот на Република Македонија.