Две групи граѓани денеска одржаа протести во Куманово, со цел да го искажат своето незадоволство затоа што речиси еден месец немаат вода.
На првиот протест, кој што се одржа на Градскиот плоштад во 11 часот, присуствуваше и градоначалникот на Куманово, Зоран Дамјановски, општинската администрација, членови на СДСМ, како и бројни граѓани.
Дамјановски истакна дека овој мирен собир е резулат на најавениот протест од политички мотивирани граѓани, кои што само еден час подоцна, поради истата причина, протестираа пред Општината.
-Ова јасно укажува дека проблемот со вода во Куманово е политички обоен, бидејќи има два различни собири. Се работи за мал протест, кој нема да продолжи, затоа што во моментов екипа од јавното претпријатие Водовод и Водостопанство, предводени од пратеникот Зоран Ѓеоргиевски се на средба со министерот за земјоделство, за да најдат решение за овој повеќегодишен проблем-истакна Дамјановски.
Само еден час по протестот на Градскиот плоштад, неколкумина жители од населбата Карпош, револтирани од претходниот протест, но и од тоа што веќе еден месец се без вода, протестираа пред Општината и го обвинија градоначалникот и јавното претпријатие „Водовод“ дека се виновни за проблемот.
-Не сакаме политичко обележување, не подржуваме ниту една политичка партија, туку бараме основни граѓански права кои што ни се загарантирани. Тој што е виновен, проневерил пари и не сака да ни ги овозможи условите за живот, тогаш нека одговара за тоа. Сите се обвинуваат и ја префрлаат топката од еден на друг. Ние ги плаќаме сметките и сакаме вода-истакнаа граѓаните.
Градоначалникот на Куманово ги прими граѓаните од населбата Карпош, при што им соопшти дека групите на ЈП Водовод, Водостопанство и министерот за земјоделство постигнале договор за алтернативен вод на бајпас и веќе во понеделник треба да започне нормално водоснабдување.
Е.Г.