Во Охрид денеска ќе биде отворена 9. Меѓународна научна конференција за одржлив развој на системи за енергија, вода и животна средина – SEE SDEWES Ohrid 2014.
Форумот е во организација на Истражувачкиот центар за енергетика и одржлив развој при Македонската академија на науките и уметностите (ИЦЕОР – МАНУ), Универзитетот во Загреб и Техничкиот институт во Лисабон (IST).
Конференцијата е посветена на унапредување и ширење на знаењето за методите, технологиите и политиките во функција на постигнување одржливост преку раздвојување на растот од природните ресурси и премин кон економија базирана на знаење.
На конференцијата ќе учествуваат повеќе од 120 научници од 32 земји, кои своите научни резултати ќе ги претставуваат во паралелни сесии, научни панели и предавања. Најдобрите трудови ќе бидат поканети за објавување во партнерските меѓународни научни списанија со импакт фактор.
