Во седиштето на Националниот демократски институт (НДИ) во Скопје, претседателот на ДУИ Али Ахмети денеска оствари работна средба со Хауард Дин, поранешен претседател на Демократската партија на САД, гувернер и член на Управниот одбор на НДИ.
Ахмети и Дин разговараа за соработката на ДУИ со НДИ во изминатите 12 години, како и за потребата од нејзино продолжување.
Како што соопшти ДУИ, на средбата станало збор и за политичките случувања во земјата и регионот. Ахмети укажал на важноста од евро-атлантските интеграации и потребата од поголемо и директно ангажирање на меѓународната заедница во овој процес.
– Одлуката на самитот на НАТО во Букурешт во 2008 година каде се наведува дека Македонија ќе биде примена во НАТО само да се постигне компромис со јужниот сосед, се уште е во сила. За оваа причина, за членство во НАТО, на Македонија не и е потребно проширување на самитот, туку компромис со Грција за прашањето за името. Времето е сега и дека страните се многу блиску до компромис, но треба да седнат и да разговараат со меѓународно посредство, посочил лидерот на ДУИ.
Ахмети изразил задоволството од успешната соработка со Институот, нагласувајќи дека од сите политички партии во земјата, НДИ има најдолго партнерство со ДУИ.