Претседателот на Демократската унија за интеграција Али Ахмети денеска во седиштето на партијата во Тетово имаше средба со грчкиот амбасадор во Македонија Харис Лалакос.
– Амбасадорот Лалакос му честиташе на Ахмети за убедливата победа на изборите на 27 април и ја поздрави одлуката за да се фокусираат сите сили на оваа Влада кон интеграцијата на земјата во НАТО и ЕУ. Тој истакна дека во Грција има готовност да се интензивираат разговорите за постигнување компромис со Скопје во рамките на процесот кој се води во Обединетите нации, соопшти ДУИ.
Партијата наведува дека Ахмети нагласил дека ДУИ е поборник за мир, стабилност, сигурност, добри односи помеѓу заедниците, добрососедски односи и економски развој и дека сето тоа се постигнува само преку успешен интегративен процес на земјата во НАТО и ЕУ.
– Претседателот Ахмети ја подвлече готовноста на ДУИ за директен придонес кон постигнување компромисно решение со нашиот јужен сосед и нагласи дека меѓународното олеснување е неопходно и би го олеснило процесот на постигнување решение, стои во соопштението на ДУИ.
