Холандскиот тренер Луис Ван Гал од новата сезона ќе биде на чело на Манчестер Јунајтед, соопшти клубот. Ван Гал на клупата на 20.кратниот шампион на Англија ќе го замени Дејвид Мојс, кој пред крајот на сезоната доби отказ поради слабите резултати во првенството (7.место) и неуспесите во куп натпреварите, како и тоа што не избори пласман во еврокуповите во претстојната сезона.
Холандскиот тренер со „црвените ѓаволи“ потпиша три годишен договор, а ќе почне со работа откако ќе му завши ангажманот со холандската репрезентација на Светското првенство во Бразил.
– Моја желба беше да работам во Премиер лигата. Горд сум што ќе го предводам Манчестер Јунајтед, еден од најголемите клубови на светот. Јас и клубот имаме големи амбиции и убеден сум дека заедно ќе создадеме историја, изјави Ван Гал.
Еден од помошниците ќе биде и легендата на Манчестер Јунајтед, Рајан Гигс, кој на последните неколку натпревари ги водеше натпреварите на Манчестер Јунајтед, а воедно ќе биде и одговорен во период додека Ван Гал е со репрезентацијата на Холандија. Како помошници ќе работат уште и Франс Хоек и Марсел Боут.
Во својата долгогодишна кариера 62-годишниот стручњак има освоени 19 трофеи, а со Ајакс има освоено и титула европски шампион. Шампионски титули во националните првенства има освоено со Ајакс и АЗ (Холандија), Барселона (Шпанија) и Баерн (Германија).