Четири години по донесувањето на Законот за спречување од дискриминација, потребата за заштита на ЛГБТ заедницата од дискриминација и насилство е сé поочигледна. Имено, Комисијата за заштита од дискриминација заклучува дека ЛГБТ популацијата е жртва на дискриминација мотивирана од омраза, сторена преку изјави или однесувања на поединци со кои се нарушува достоинството на едно лице или група на лица. Во 2013 година, Македонија доби 13% на Rainbow мапата на ИЛГА-Европа, односно најниска оцена во регионот за состојбата на човековите права на ЛГБТ лицата.
Националната мрежа против хомофобија и трансфобија прв пат на јавен простор во Македонија, оваа година ќе го одбележи Интернационалниот ден за борба против хомофобија на 18 мај (недела) во Градскиот Парк. Од пладне до 16 часот во градскиот парк активистите од Мрежата ќе организираат јавен настан на кој ќе побараат измени и дополнувања на анти-дискриминацискиот закон со внесување на сексуалната ориентација и родовиот идентитет во членот 3 меѓу останатите основи на дискриминација.
Имено, Законот за спречување и заштита од дискриминација донесен 2010 година како основи за дискриминација во член 3 не ги содржи сексуалната ориентација и родовиот идентитет. Законот во оваа форма беше предмет на дебата и предизвика реакции на незадоволство на здруженијата кои ги застапуваат правата на ЛГБТ заедницата и нивните поддржувачи. Исто така меѓународната јавност посочи на потребата од јасно дефинирање на сексуалната ориентација и родовиот идентитет како дискриминаторски основи со што би се овозможила недвосмислена заштита на ЛГБТ лицата.
Активистите за ЛГБТ права ги повикуваат сите граѓани и граѓанки да се приклучат на настанот, да се забавуваат со DJ сетовите на Соња Исмаил, Зоки Бејбе и Мирко Попов и заедно да кажат НЕ! на хомофобијата, трансфобијата, дискриминацијата, говорот на омраза и насилството врз лезбејките, геј мажите, бисексуалците, трансродните и интерсексуалните луѓе.
А.Б.