Роза Топузова Каревска од ЛДП е единствениот опозициски пратеник, кој се премислува дали да ја поотпише изјавата дека не го прифаќа пратеничкиот мандат, како и сите 119 пратеници кои беа на листите на опозицијата, или да влезе во Парламентарниот дом.
Нејзината матична партија ЛДП, како и СДСМ и НСДП едногласно, поради, како што рекоа изборниот грабеж, одлучија дека не прифаќаат да бидат само демократски декор во Собранието избрани на вакви избори.
Топузова Каревска на партиското раководство телефонски му одговарала дека и треба време да размисли како ќе постапи. Веќе една недела не одговара на телефонските повици од партијата, а нејзините домашни бараат таа да не се вознемирува бидејќи била во болница.
Безуспешни беа и нашите обиди да стапиме во контакт со неа, и да добиеме одговор дали таа единствено од опозицијата ќе и даде легитимитет на власта или сепак ќе постапи како нејзините колеги.
Таа беше на добитното трето место во Изборната единица 4, благодарение на договорот на лидерот на ЛДП со опозициската коалиција.
Роза Топузова Каревска беше пратеник од 2002 до 2011-та година. Беше противник за напуштање на Парламентот кога тоа го направи тогашната опозиција. Во периодот по локалните избори до предвремените парламентарни избори работеше во општина Центар.