Добрососедските односи, решавање на прашањето за името и интеграцијата на Македонија во НАТО и ЕУ се дел од темите на кои денеска дискутираа претседателот на ДУИ Али Ахмети и евроамбасадорот Аиво Орав.
На средбата во седиштето на ДУИ во Тетово, Орав на Ахмети му честитал за постигнатиот резултат на изборите, што се одржаа на 27 април и за спроведувањето на изборниот процес.
– Започнатите разговори на двете страни кои добија апсолутен легитимитет, кај двете етнички заедници, ДУИ и ВМРО-ДПМНЕ, се започнати и се развиваат во правец на хармонизација на изборната платформа и на видувањата за иднината на земјата, како и земање на поголема одговорност во овој мандат, се вели во соопштението од ДУИ.
Албанските граѓани, нагласил Ахмети на средбата, правилно ја проценле платформата на ДУИ и приоритетите на партијата за интеграција на земјата во НАТО и ЕУ, за помирување, за зближување, за добрососедски и меѓуетнички односи и за економскиот развој.
Евроатлантските интеграции се приоритет на ДУИ и затоа Ахмети ги повикал властите во Брисел и Вашингтон за да се забрза овој процес, во пресрет на самитот на НАТО во септември.