Државната изборна комисија денеска треба да ги врачи уверенијата на избраните пратеници, откако вчера ги соопшти официјалните конечни резултати од предвремените парламентарни избори што се одржаа на 27 април.
Опозицијата соопшти дека нема да ги прифати мандатите и оти тоа ќе биде потврдено со заверени нотарски изјави на нивните кандидати за пратеници. Неприфаќање на мандатот најави и Руфи Османи, единствениот пратеник на НДП што доби мандат.
На предвремените парламентарни избори од 1.780.128 запишани граѓани уставното право го искористиле 1.120.774 гласачи или 62,96 отсто.
Објавувајќи ги официјалните конечни резултати, ДИК информира за освоените мандати на партиите што освоиле доволно гласови да ги пополнат 123 пратенички места.
Во идниот состав на Парламентот ќе седнат 61 пратеник од ВМРО-ДПМНЕ, 19 од ДУИ, 7 од ДПА и 1 од ГРОМ. Опозицијата предводена од СДСМ освои 34 мандати, за кои најави дека нема да ги прифати.
Конститутивната седница на Собранието се очекува да биде свикана до крајот на неделава, откако спикерот Трајко Вељаноски официјално ќе го добие извештајот од ДИК дека предвремените парламентарни избори 2014 може да се сметаат за завршени.