Претседателот на Граѓанска опција за Македонија и лидер на коалицијата ГРОМ, Стевчо Јакимовски, вечерва, 27 април 2014 година, во централниот изборен штаб на партијата одржа конференција за печат за резултатите од предвремените парламентарни избори.
– Досега се обработени 70 проценти од гласачките ливчиња и, според податоците, ГРОМ и понатаму се бори за пратеник во изборната единица 1, 2 и во изборната единица 4. Значи, останува да видиме дали ГРОМ ќе стане парламентарна партија. Во секој случај, јас сакам уште еднаш да ѝ честитам на ВМРО-ДПМНЕ на победата. ГРОМ ги оценува овие избори како фер и демократски и од ниту еден изборен штаб на Граѓанската опција за Македонија денеска не е утврдена каква било неправилност во текот на изборите и надвор од гласачките места – изјави лидерот на ГРОМ на конференцијата за медиуми.
На новинарско прашање уште колку гласови ѝ се потребни на ГРОМ за да освои пратеничко место во новиот парламентарен состав, Јакимовски одговори дека се потребни меѓу 500 и 700 гласови, но дека се очекува финализирање на процесот на пребројување на гласовите на сите избирачки места.