Состанокот на Советот за општи работи на ЕУ не помина безболно за Грција, пишува грчкиот весник „Катимерини“ повикувајќи се на грчкото МНР.
„Неколку колеги, со помош на комесарот Штефан Филе, вршеа притисок на Македонија да и се даде датум за почеток на преговори, на што Грција и други земји силно се спротивставија“, ги пренесува весникот изјавите на изворот од министерството за надворешни работи.
Ова прашање, како и интервенциите за промена на текстот за Македонија во заклучоците, предизвикале прекин на состанокот. Грчката страна барала во текстот да стои дека Скопје треба да „направи суштински ( значителни ) чекори за добрососедство“, додека останатите не сакале да се ставаат придавки.
„На крајот се дојде до компромисниот збор ’опипливи’: Скопје треба да направи опипливи чекори за добрососедство“, пренесува „Катимерини“.