Крајно десничарската партија „Алтернатива за Германија“ (AfD) го номинираше поранешниот фудбалски репрезентативец Томас Бертолд (62) за свој кандидат на претстојните претседателски избори во Германија.
Копретседателите на партијата, Алис Вајдел и Тино Крупала, изјавија дека Бертолд би бил добар претседател за сите Германци, изразувајќи уверување дека тој би можел да добие поддршка и надвор од партиските редови.
Бертолд има одиграно 64 натпревари за германската репрезентација, со која во 1990 година стана светски шампион на Светското првенство во Италија.
Во последните години, тој исто така привлече внимание со учеството на демонстрации против владините мерки за време на пандемијата на коронавирусот.
Неговата номинација беше критикувана од Штефан Мајер, портпарол за спортска политика на конзервативниот блок на канцеларот, кој истакна дека Бертолд давал контроверзни и остри изјави за време на пандемијата и дека не е сериозен кандидат за највисоката државна функција.
Илзе Ајгнер, кандидат од Христијанско-социјалната унија (CSU), ја ужива поддршката на конзервативниот блок, Социјалдемократската партија (SPD) и партијата „Зелени“.
Гласањето за избор на наследник на актуелниот претседател Франк-Валтер Штајнмаер е закажано за 30 јануари.