Судскиот спор меѓу штипската компанија „Фокуснет“ и Македонски телеком, кој започна во 2003 година, и по повеќе од две децении останува без конечна разрешница. Случајот, во кој се испреплетуваат сомнежи за злоупотреба на монополска позиција, милионска отштета и сериозни обвинувања за неправилности во судските постапки, повторно ја отвора темата за довербата во правосудниот систем.
„Фокуснет“ во 2001 година добила концесија за обезбедување интернет-услуги, по што склучила договор со Македонски телеком за изнајмување капацитети и проширување на мрежата низ државата. До 2002 година компанијата имала пристапни точки во шест градови и покривала значителен дел од територијата. Сепак, фирмата престанала да постои на 18 декември 2002 година, а сопственикот Зоран Алесков ја започнал правната битка со Телеком.
Пресврт во случајот се случил во 2013 и 2014 година, кога Управниот и Вишиот управен суд утврдиле дека Телеком ја злоупотребил доминантната пазарна позиција, со што биле загрозени конкурентските можности на „Фокуснет“. Претходно, вакви наоди имала и Комисијата за заштита на конкуренцијата.
По овие одлуки, Алесков повел постапка за надомест на штета. „Фокуснет“ побарала 241,5 милиони денари по основ на изгубена добивка, со камати. Судот ангажирал вештаци за утврдување на штетата, но по повеќегодишна постапка, во 2023 година Основниот граѓански суд ја одбил тужбата.
Компанијата поднела жалба, а во 2024 година Апелацискиот суд во Скопје ја преиначил првостепената пресуда и досудил речиси четири милиони евра отштета за „Фокуснет“.
Од Македонски телеком реагирале дека во постапката биле користени материјали кои не биле предложени ниту изведени како докази пред првостепениот суд. Според компанијата, тоа претставувало сериозна повреда на правото на фер судење и отворало сомнежи за незаконско влијание врз постапката.
Разрешувања и истрага за судски неправилности
Случајот добил дополнителна димензија со постапките пред Судскиот совет. Во февруари 2026 година, по повторно разгледување на предметот, Советот донел одлука за разрешување на судијките Наташа Савовска Димитровска и Роза Георгиева, кои биле дел од судечкиот совет на Апелацискиот суд. Третата судијка, Јетмире Ајдини, добила парична санкција.
Претходната одлука за разрешување била поништена од Врховниот суд, по што Судскиот совет повторно ја разгледал постапката и донел идентична одлука.
Ајдини претходно укажала на постоење два различни записници од исто судско рочиште, изнесувајќи сомнежи дека едниот бил фалсификуван. Во меѓувреме, Савовска Димитровска ја обвинила поранешната членка на Судскиот совет, Тања Чачарова Илиевска, за судир на интереси и недозволено влијание врз постапката за нејзино разрешување.
Разрешената судијка тврдела дека Судскиот совет навлегол во оценување на законитоста на судската пресуда, иако тоа не е во неговата надлежност, а постапката се водела додека предметот сè уште бил пред Врховниот суд.
Дополнително, Основното јавно обвинителство отворило предистражна постапка за можни злоупотреби и незаконитости при донесувањето на пресудата. Адвокатот на судијката, Ѓорѓе Поп-Кочев, изнесол сомнежи за притисоци врз судиите и тврдења дека Телеком располагал со информации за пресудата пред таа официјално да им биде доставена на странките.
Конечната разрешница сè уште се чека
Спорот меѓу „Фокуснет“ и Телеком сè уште не е завршен. Врховниот суд треба да одлучи за законитоста на пресудата со која е досудена отштета од речиси четири милиони евра, додека извршната наплата е привремено запрена по предлог на обвинителството, до завршување на истражните постапки.
По повеќе од 24 години судски постапки, случајот останува еден од најконтроверзните примери за долготрајни деловни спорови во македонското правосудство. Наместо конечна правна разрешница, тој отвора нови прашања за судската независност, одговорноста и еднаквоста пред законот.
Целиот текст на следниот линк