Ставот на американскиот претседател Доналд Трамп дека ризиците од вештачката интелигенција се преувеличени е одраз на поширока „слепа точка“ во општеството, оцени коосновачот на „Мајкрософт“, Бил Гејтс, во интервју за CBS Mornings.
Според Гејтс, голем дел од јавноста сè уште не е свесен колку брзо големите јазични модели можат да го променат начинот на кој функционира општеството.
Тој го коментираше неодамнешниот став на Трамп дека предупредувањата за сериозната штета што би можела да ја предизвика вештачката интелигенција се „измама“.
„Тој е на истото место како и сите други, во фаза во која се прашувате дали ова е само уште една технологија како оние од минатото“, рече Гејтс.
Според него, вештачката интелигенција има голем потенцијал за подобрување на животот, но истовремено може да биде злоупотребена за биотероризам, финансиски напади и други деструктивни активности.
„Ако сака да добие признание за помагање на целиот свет, темата за вештачката интелигенција е негова најдобра можност. Лидер кој ќе ги обедини луѓето околу ова прашање ќе заслужи позитивно признание“, рече Гејтс.
Дебатата за ризиците од вештачката интелигенција се интензивираше во технолошкиот сектор. Меѓу оние кои предупредуваат за можните последици се и директорот на „Антропик“, Дарио Амодеи, и директорот на „ОпенАИ“, Сем Алтман, кои во различни контексти повикаа на поголема претпазливост при развојот на технологијата.
„Поголемиот дел од општеството сè уште не е свесен колку брзо се одвиваат работите“, рече Гејтс.
Тој смета дека споредбите со претходните технолошки промени не се целосно соодветни бидејќи вештачката интелигенција има потенцијал да надмине одредени човечки способности.
„Вештачката интелигенција е речиси еволутивен настан“, изјави тој.
Гејтс неодамна предупреди и дека вештачката интелигенција може значително побрзо од претходните технолошки револуции да го трансформира глобалното стопанство, со што се скратува времето за подготовка за промените на пазарот на трудот.
Според него, вештачката интелигенција во следната деценија би можела да влијае врз работните места во правото, корисничката поддршка, медицината, развојот на софтверот и производството. Тој очекува да се појават и нови работни места, но предупредува дека без соодветни политики нивниот број би можел да биде помал од бројот на денешните работни места.
Гејтс во интервјуто истакна дека вештачката интелигенција може да има значајна примена во образованието, здравството и земјоделството.
Неговата фондација планира во следните две години да вложи една милијарда долари за проширување на пристапот до вештачка интелигенција, вклучително и овозможување користење големи јазични модели на јазици што не се англиски.
Иницијативата за подобрување на пристапот до вештачка интелигенција на повеќе јазици вклучува околу 60 учесници, меѓу кои „Антропик“, „Гугл“, „Мајкрософт“ и „ОпенАИ Фондацијата“.
„Сакаме во места како Африка, каде што има многу малку лекари, пациентот на својот мајчин јазик да може да ги опише симптомите на апликација со вештачка интелигенција“, рече Гејтс.
Тој додаде дека квалитетот на поддршката за повеќето светски јазици во моментов е „многу, многу лош“.