Дејвис Овејн, директор на инженерската компанија „Амкану“ од Јужен Велс, бил во авионот „Cirrus SR22T“ кој во вторникот се урна во близина на Лојкербад, во кантонот Вале, Швајцарија, пишува Daily Mail.
Меѓу тројцата загинати во несреќата бил и уште еден британски државјанин.
Авионот полетал од аеродромот Сион во долината на Рона, а околу 10 минути подоцна удрил во северната падина на планината во областа Флухалп. Нешто по 16 часот во тој дел од планината бил пријавен чад.
На местото на несреќата пристигнале пожарникари, полицајци и спасувачки екипи со хеликоптери, но причината за падот засега не е позната.
Истрагата ја водат Швајцарскиот одбор за безбедност во сообраќајот, полицијата на кантонот Вале и канцеларијата на главниот обвинител.
Компанијата „Амкану“ се прости од Дејвис, опишувајќи го како „незапирлива сила“, ментор и „многу добар пријател“.
„Пред сè, тој беше сопруг, татко и дедо“, наведоа од компанијата.
Дејвис бил искусен пилот и голем љубител на авијацијата. Поседувал сопствен хеликоптер и бил активен во авијациската заедница. Од 2017 година бил и член на управниот одбор на хуманитарната организација „Wales Air Ambulance“.
Идентификацијата на третата жртва сè уште е во тек.