– Демократската унија за интеграција ја поздравува изјавата на премиерот Христијан Мицкоски за подготвеноста на ВМРО-ДПМНЕ, доколку во Собранието има такво барање, да се оди на предвремени парламентарни избори. Подготвеноста решенијата да се бараат преку институциите и преку волјата на граѓаните е одговорност што треба да се поздрави – велат од ДУИ преку соопштение.
ДУИ континуирано ја истакнува потребата од стабилна, функционална и легитимна влада, која ќе ја одразува политичката волја и легитимитетот на најголемите заедници во земјата. Институционалната стабилност и правичната застапеност се предуслови за справување со предизвиците со кои се соочува земјата.
Во таа насока, политичката подготвеност да им се врати на граѓаните правото на збор преку предвремени парламентарни избори, ДУИ ја оценува како сериозна и институционална можност, ставајќи го во преден план интересот на граѓаните, политичкиот легитимитет и долгорочната стабилност на земјата, велат од ДУИ.