Доналд Трамп изјави дека на секој полнолетен Американец ќе му исплати „Трампова дивиденда“ од 5.000 долари (околу 4.300 евра) доколку републиканците ја задржат контролата врз Конгресот на ноемвриските избори.
NEW: President Trump makes a major promise at the Republican midterm convention in Dallas: $5,000 for every adult U.S. citizen if Republicans win both the House and Senate in the midterms.
“I will issue a dividend to every adult citizen in the United States of America for $5,000.”
— Fox News (@FoxNews) September 10, 2026
„Ако републиканците го освојат Претставничкиот дом и Сенатот – и двата дома, благодарение на нашата огромна економска сила и успех – ќе исплатам дивиденда од 5.000 долари на секој полнолетен граѓанин на Соединетите Американски Држави. Единствениот услов е таа дивиденда да се потроши во САД“, рече Трамп во Далас на првата конвенција на Републиканската партија посветена на изборите на половина од претседателскиот мандат.
Сепак, „Ројтерс“ пишува дека веднаш не било јасно како би се спровеле исплатите, ниту дали тие би биле законски. Со оглед на тоа што во САД живеат околу 270 милиони полнолетни лица, ваквата мерка би чинела приближно 1,35 билиони долари (околу 1,16 билиони евра).
Во својот говор Трамп се пофали со „двете најдобри години во историјата на претседателската функција“, ставајќи се во самиот центар на изборите и покрај падот на неговата популарност.
Сепак, не е јасно дали неговиот говор, сличен на настапите од предизборната кампања, ќе им се допадне на клучните неопределени гласачи кои, според анкетите, се оддалечуваат од Републиканската партија поради зголеменото незадоволство од трошоците за живот и војната со Иран, анализира „Ројтерс“.
„Ако иднината на Америка им ја препуштиме на радикално левичарските демократи, на нашата земја ќе ѝ треба целата следна деценија само повторно да застане на нозе. Гласајте за републиканците и ќе го оставиме остатокот од светот далеку зад нас, и тоа за генерации“, порача Трамп.
Дводневниот собир во Далас, на кој Трамп денеска ќе го одржи завршниот говор по главното обраќање на потпретседателот Џеј-Ди Венс, според „Ројтерс“ покажува колку судбината на републиканците е поврзана со Трамп и служи како приказ на нивната стратегија пред изборите на 3 ноември.
Трамп во говорот ја бранеше својата одлука за нападот врз Иран, велејќи дека дејствувал за да го спречи Техеран да развие нуклеарно оружје. Тој, исто така, вети дека цените на нафтата ќе паднат „штом ќе ја добиеме војната со Иран“, за која тврдеше дека наскоро ќе заврши.
Тој рече и дека САД би можеле да ја нападнат иранската локација Пикекс Маунтин, каде што, според неговите тврдења, длабоко под земјата се работи на нуклеарни капацитети, и го повика Техеран да биде внимателен.
„Забележуваме одредени активности на локацијата Пикекс. Би го советувал Иран да не прави никакви трикови, бидејќи ќе мора многу силно да ги погодиме“, порача Трамп.
Повеќето други говорници на републиканската конвенција главно се фокусираа на напади врз демократите, претставувајќи ги како екстремни по прашања како учеството на трансродови жени во спортот и безбедноста на границите.
Тие ги нарекуваа демократите и социјалисти и комунисти, додека сенаторот Тим Скот од Јужна Каролина ги опиша како „опасни, радикални и чудни“.
„Ројтерс“ наведува дека републиканците се обидуваат да ја задржат контролата врз Сенатот и Претставничкиот дом на изборите на 3 ноември, но се соочуваат со пад на поддршката за Трамп и зголемена мотивација кај демократските гласачи.