Русија ќе го затвори германскиот Генерален конзулат во Санкт Петербург, како и центрите на „Гете-институтот“ низ земјата. Одлуката е одговор на претходните мерки на Германија, која најави затворање на рускиот конзулат во Бон и на Рускиот дом во Берлин.
Германскиот конзулат во Санкт Петербург треба да престане со работа најдоцна до 18 септември, а неговите вработени дотогаш мора да ја напуштат Русија. Вработените во „Гете-институтот“, пак, добиле рок да заминат од земјата до 13 септември.
Германските мерки беа донесени по инцидентот на аеродромот Лајпциг/Хале. Берлин ја обвинува Москва за обид за напад со дрон во близина на украински транспортен авион, што се случил на почетокот на август. Русија ги негира обвинувањата.
Поради инцидентот, Германија одлучи да го затвори рускиот конзулат во Бон и Рускиот дом во Берлин, да ги заостри условите за влез на руски државјани и да преземе дополнителни мерки против лица и организации за кои смета дека се поврзани со руско хибридно дејствување.
Русија сега одговори со исти мерки против германските дипломатски и културни претставништва. Москва ја обвини германската влада дека предизвикува ново влошување на односите меѓу двете земји и порача дека таа ќе биде одговорна за последиците.