Портпаролката на руското Министерство за надворешни работи, Марија Захарова, денеска изјави дека американските ракетни системи во Норвешка ќе бидат под посебен надзор на руските сили и оцени дека распоредувањето на ракетите негативно влијае на односите меѓу Русија и САД.
„Потезите како што е распоредувањето на американски ракети со копнено базирање во Европа, кои ја загрозуваат Руската Федерација – благо кажано – ќе ги поништат предусловите за конструктивен разговор со Соединетите Држави за стратешки прашања“, напиша Захарова во соопштение, пренесе „Спутник“.
Според неа, ракетните системи можат да се користат за лансирање ракети „Томахавк“, а нивното распоредување во Норвешка овозможува покривање на значителен дел од европскиот дел на Русија, вклучително и Москва.