Стратешкиот извидувачки авион „Боинг RC-135W Rivet Joint“ на американските воздухопловни сили исчезна од службите за следење на летот за време на мисија над Баренцовото Море, објавија руските медиуми.
Авионот полетал од британската воздухопловна база „Милденхол“ околу 12:30 часот по московско време, а потоа летал по норвешкиот брег. Влегол во воздушниот простор над Баренцовото Море околу 15:50 часот и започнал да патролира северно од Мурманск.
По околу еден час, авионот го сменил правецот и почнал да се движи кон запад. Неговиот сигнал исчезнал од јавните платформи во 16:40 часот, на позиција околу 400 километри северно од руската граница.
Според достапните информации, најверојатната причина за исчезнувањето на авионот било исклучувањето на неговиот предавател на податоци за позицијата. Нема индикации дека авионот претрпел инцидент, додека неговата дестинација не била наведена на службите за следење на летот.
RC-135W е дизајниран да собира, анализира и проследува електронски и комуникациски разузнавачки податоци. Ваквите авиони од страна на Соединетите Американски Држави и другите членки на НАТО редовно извршуваат мисии во близина на руската граница.
Рускиот весник „Взгљад“ претходно објави дека два британски извидувачки авиони летале по руската граница во среда.
Рускиот амбасадор во Осло, Николај Корчунов, неодамна ја критикуваше одлуката на Норвешка да ги стави своите воени бази на располагање на воздухопловните сили на НАТО, велејќи дека ваквите потези ги зголемуваат тензиите во северна Европа.
Во март 2024 година, руски борбен авион МиГ-31 полета откако два американски стратешки бомбардери се приближија до руската граница над Баренцовото Море. Потоа американските авиони се оддалечија од областа.