Латвискиот премиер Андрис Кулбергс побара од Европската унија седум милијарди евра за покривање на воените и економските трошоци предизвикани од конфронтацијата на неговата земја со Русија, оценувајќи дека земјите од источното крило на ЕУ го поднесуваат непропорционално големиот дел од товарот во справувањето со Москва.
Во интервју за бриселскиот портал „Политико“, Кулбергс изјави дека средствата треба да се обезбедат од следниот седумгодишен буџет на ЕУ, преку новиот Фонд за конкурентност, и да се искористат за покривање на зголемените трошоци за одбрана и загубите предизвикани од колапсот на трговијата со Русија по почетокот на руската инвазија врз Украина.
Побараните седум милијарди евра би претставувале речиси половина од проценетите 15,1 милијарди евра што Латвија треба да ги издвои за одбрана во текот на седумгодишниот буџетски период.
Барањето на Рига доаѓа пред парламентарните избори закажани за 3 октомври, додека во земјата замав земаат политичките сили кои сметаат дека Латвија треба да добие поголем финансиски надомест за поддршката на санкциите против Русија и воената помош за Украина.
Европската комисија предложи зголемување на издвојувањата за одбрана на ниво на ЕУ во буџетот за периодот 2028-2034 година, вклучително и 125,2 милијарди евра за безбедност, одбранбена индустрија и вселенски сектор во рамките на Европскиот фонд за конкурентност.
Сепак, тие средства се наменети за финансирање проекти низ целата ЕУ, а не за однапред утврдена исплата од седум милијарди евра за Латвија.
Кулбергс смета дека Латвија заслужува посебна поддршка бидејќи се задолжува за да ја зголеми безбедноста на земјите што се многу подалеку од руските граници.
Тој додаде дека голем дел од парите што Латвија ги издвојува за армијата се враќаат кај побогатите западноевропски земји преку набавка на оружје од Германија, Франција, Шпанија, Шведска и Холандија.
Во пресрет на изборите, слични барања упати и политичарот Ајнарс Шлесерс, чија партија во Европскиот парламент е дел од групата „Патриоти за Европа“.
Тој смета дека Латвија треба да добие финансиска поддршка кога ги поддржува санкциите против Русија, оценувајќи дека земјата не може бесконечно да ги поднесува нивните економски последици.