Украинскиот претседател Володимир Зеленски изјави дека Украина на американските преговарачи им ги доставила своите предлози за план за завршување на војната со Русија. Воедно, тој предупреди дека Москва би можела да ги искористи септемвриските парламентарни избори како изговор за прогласување нова мобилизација.
Zelensky says Ukrainian military intelligence obtained internal Russian documents confirming preparations for a new mobilization in autumn, after what he called an imitation of parliamentary elections. According to Zelensky, Putin plans to rapidly mobilize several hundred… pic.twitter.com/FPVtEb5sK2
— NOELREPORTS 🇪🇺 🇺🇦 (@NOELreports) August 11, 2026
Зеленски во своето вечерно видеообраќање во вторникот рече дека Украина ги предала предлозите на американската страна, додавајќи дека Вашингтон може да помогне во зајакнувањето на украинската одбрана, особено противвоздушната, но и да изврши притисок врз Москва.
„Ги доставивме нашите предлози до американската страна. САД можат да помогнат во зајакнувањето на нашата одбрана, пред сè противвоздушната, и да извршат притисок врз Русија за нејзините планови да бидат поинакви – да се подготвува за прекин на војната, а не за нејзино продолжување“, рече Зеленски.
Тој не откри детали од украинските предлози.
Американските преговарачи Стив Виткоф и Џаред Кушнер последен пат беа во Москва во јануари, но сè уште немаат отпатувано во Киев. Украина повеќепати повикува на прекин на огнот по речиси четири и пол години војна.
Москва тврди дека сака договор, но инсистира секое решение да опфати целосно откажување на Украина од четирите региони на кои Русија полага право, како и решавање на, како што ги нарекува, „темелните причини“ за конфликтот.
Зеленски тврди дека украинските разузнавачки служби имаат информации оти Русија планира по септемвриските парламентарни „избори“ да започне нова мобилизација.
„Тие се подготвуваат за мобилизација наесен, веднаш по имитацијата на парламентарните избори“, рече украинскиот претседател.
Според него, целта е да се создаде впечаток дека руското население ја поддржува војната. Зеленски тврди дека Москва планира до крајот на годината да мобилизира неколку стотици илјади луѓе, а сличен број и во текот на следната година.
Новата мобилизација, според него, би била дополнување на регрутирањето преку договори со војници.
Јаблоко исклучено од изборите
На претстојните парламентарни избори се очекува владејачката Единствена Русија, која ја поддржува Владимир Путин, како и други главно прокремљовски партии, да ја задржат доминацијата во парламентот.
Рускиот Врховен суд во понеделникот ѝ забрани на либералната партија Јаблоко да учествува на изборите. Партијата е единствената официјално регистрирана политичка сила во Русија која отворено се спротивставува на војната во Украина.
Русија во 2022 година прогласи „делумна мобилизација“, неколку месеци по почетокот на инвазијата.
Зеленски и претходно предупредуваше дека Москва би можела да спроведе нова мобилизација, додека руските власти досега ги отфрлаа ваквите наводи.
Поранешниот руски претседател Дмитриј Медведев минатиот месец изјави дека на Русија не ѝ е потребна нова мобилизација, бидејќи, според него, околу 200.000 доброволци потпишале договори со руските вооружени сили во првата половина на 2025 година.